«Siyasi məhbuslarsız Azərbaycan» Ictimai Alyansı Amnesty Internationala müraciət etdi
Azərbaycanda prezident seçkiləri ərəfəsində repressiya dalğası geniş vüsət alır. Bu barədə “Siyasi məhbuslarsız Azərbaycan” Ictimai Alyansının üzvü, keçmiş “vicdan məhbusu” Elşən Həsənov dünənki “dəyirmi masa”da bildirib.
O bildirib ki, repressiyalar yalnız siyasi fəallara qarşı deyil, həm də sıravi vətəndaşlara qarşı həyata keçirilir. E.Həsənov həbs olunanlara qarşı işgəncələrin verildiyini qeyd edib. Siyasi repressiyalara son nümunə kimi hüquqşünas Qurban Məmmədova qarşı cinayət işini göstərib.
Vətəndaş cəmiyyətinin digər fəalı, hüquqşünas Namizəd Səfərov bildirib ki, hakimiyyət demokratiya uğrunda mübarizələrə qarşı müharibə elan edib. “Qurban Məmmədov siyasi motivlərlə, hakimiyyəti açıq tənqid etdiyinə görə həbs olunub”,- N.Səfərov vurğulayıb və yol qəzasının törədilməsi ilə bağlı ittihamın əsassız olduğunu bildirib.
Hüquq müdafiəçisi Vidadi Isgəndərov vətəndaşların siyasi motivlərlə ayrı-seçkiliyə məruz qaldığını bildirib. O xatırladıb ki, Yeni Azərbaycan Partiyasından deputat Aydın Mirzəzadə ölümlə nəticələnən yol qəzası törədib, amma həbs olunmayıb. Lakin Q.Məmmədov həbs edilib.
Keçmiş müdafiə naziri Rəhim Qazıyev vətəndaş cəmiyyətini konsolidasiyaya çağırıb. Onun fikrincə, yalnız birgə səylərlə repressiyaların və qanunsuzluğun qarşısını almaq olar. Görüşün yekunlarına əsasən bəyanat qəbul olunub. Bəyanatda repressiyalara, işgəncələrə, fəallara təzyiqlərə son qoyulması tələb olunur.
Bundan əlavə, sənəddə Amnesty International Qurban Məmmədovu “vicdan məhbusu” kimi tanımağa çağırılır.
